>>> ကျွန်တော် မခံနိုင်တော့ဘူးဗျာ။ ခေါင်းထဲက မူးသလိုလို ဖြစ်လာပြီး တအားအန်ချင်လာတယ်။ အပြင်ကိုသွားဖို့ အင်အားကလည်း မရှိတော့သလိုပဲ။ ခုကျွန်တော်က ကိုကို ရဲ့ ကုတင်ပေါ်မှာ… (ကျွန်တော့ သခင်လေ.. ကိုကိုဆိုတာ။ ကျွန်တော်ကတော့ အဲလိုပဲခေါ်တယ်။ ကိုကိုကတော့ ကျွန်တော့ကို အရင်က ပူစီလေးတဲ့။ ဒါပေမယ့် ခုနောက်ပိုင်း ဘာရယ်ကြောင့်လည်း မသိဘူး။ ပူရှကင်လို့ ပြောင်းခေါ်နေတယ်လေ။ ဒီနာမည်လေးလည်း ကျွန်တော်ကြိုက်ပါတယ်။ ပူရှကင်ရေ.. တစ်.. တစ်.. တစ် ဆိုရင် ကိုကို ကျွန်တော့ကို ခေါ်နေမှန်း ကျွန်တော်သိတယ်။) ကုတင်ပေါ်မှာ မအန်ရဘူးဆိုတာကို ကျွန်တောသိပါတယ်။ ဒါပေမယ့်လည်း ကျွန်တော်ဘယ်လိုမှ မတတ်နိုင်တာနဲ့ ဝေါ့ခနဲ ဆိုပြီး အန်ချလိုက်မိတယ်။ အဲဒီမှာ ကိုကို က .. အာ.. ပူရှကင်တော့ လုပ်တော့မယ်ဆိုပြီး ကျွန်တော့ကို ကုတင်ပေါ်က သာသာယာယာ အောက်ကို ပွေ့ချလိုက်တယ်။ ကိုကို့ရဲ့ အခန်းဖော်သူငယ်ချင်းတွေကတော့ ကျွန်တော့ကို ရွံရှာ စက်ဆုပ်တဲ့ မျက်လုံးတွေနဲ့ ကြည့်နေတယ်ဆိုတာ ကျွန်တော် သိပါတယ်လေ.. ။ ကိုကိုကတော့ အဲလိုမဟုတ်ဘူး..။ ကျွန်တော် ကုတင်ပေါ်မှာ အန်ချထားတာလေးကို စိန်ပြေနပြေ ကျုံးနေလေရဲ့။ ကိုကို့ကို ကျွန်တော်ချစ်တဲ့ အထဲမှာ အဲဒါတွေလည်းပါတယ်။ ကိုကိုက ကျွန်တော်သိသလောက် တစ်ဖက်သားအပေါ် တအားစာနာတတ်တာ။ ခုလည်းကြည့်လေ.. ကျွန်တော့ကို သနားကရုဏာ မျက်လုံးလေးတွေနဲ့ ကြည့်နေလေရဲ့.. သူငယ်ချင်းတွေရှေ့မှာမို့လို့ ကျွန်တော့ကို အသံထွက်စကားမပြောပေမယ့် ကိုကို စိတ်ထဲကပြောနေတာကို ကျွန်တော် အတိုင်းသားကြားနေရတယ်။ မေတ္တာတရားတွေစွက်နေတဲ့ ကရုဏာစကားသံလေးတွေကိုပေါ့။

>>> ကျွန်တော် မှတ်မိသေးတယ်။ ကိုကိုတို့က ဒီကို ရောက်တာသိပ်မကြာသေးဘူး။ ဒါပေမယ့် ကိုကို ကျွန်တော့်ကိုမြင်မြင်ချင်း ချစ်သွားတာကိုတော့ ကျွန်တော်နောက်ပိုင်းမှ သိလိုက်ရတယ်။ အဲဒီတုန်းကတော့ ကိုကို့ကို ကျွန်တော် ရင်းရင်းနှီးနှီး မခင်မိသေးဘူး။ ကိုက်ိုကတော့ အဲဒီအချိန်ကတည်းက ကျွန်တော့ကို တတ်နိုင်သလောက် သူစားမယ့်အထဲက ကျွေးတယ်။ ကျွန်တော်ကတော့ စားရုံကလွဲပြီး သိပ်ပြီး ကိုကို့အပေါ် မခံစားတတ်သေးဘူး.. မချစ်တတ်သေးဘူးပေါ့ဗျာ။ အဲဒါနဲ့ပြောရဦးမယ်.. ကိုကို မတိုင်ခင်ကျွန်တော့သခင်က ကောင်မလေးဗျ။ ပြောကြတာတော့ တရုတ်မလေးတဲ့။ ခုတော့လည်း ကိုကို့ကို အဲဒီကျွန်တော့အရင်သခင် တရုတ်မလေးထက် ပိုမိုလို့ သဒ္ဓါပို ချစ်ခင်သွားမိပြီလေ။ အဲဒါကြောင့်လည်း ကိုကို့အခန်းမှာပဲ ကျွန်တော် အနေများတော့တယ်။ ကိုကိုက ကျွန်တော့ကို မငြိုငြင်ပေမယ့် သူ့အခန်းဖော်တွေရှိသေးတော့ ကျွန်တော့အပေါ် နည်းနည်းလေး စိမ်းစိမ်းကားကား ဆက်ဆံနေသလိုဖန်တီးနေတယ်လေ..။ ဒါပေမယ့် ကိုကို့ကို ကျွန်တော်နားလည်ပါတယ်။ လူလစ်ရင်လစ်သလို ကျွန်တော့ကို ဆွဲပွေ့တတ်တဲ့ အကျင့်၊ တစ်ခါတစ်ခါ ခိုးနမ်းတတ်တဲ့ အကျင့်လေး တွေကို ကျွန်တော်တွေ့လာတော့ ကိုကို့ရဲ့ အယုအယလေးတွေမှာ ကျွန်တော်ကျေနပ် ကြည်နူးနေမိသလို၊ ကိုကို့ကိုလည်း တိုးလို့ ချစ်လာရတော့တာပေါ့။

>>> ကိုကို့သူငယ်ချင်းတွေ ကျွန်တော်တို့ကို ပြောကြတာရှိတယ်။ *ဒီကကြောင်တွေက အော်လည်းမအော်ဘူး။ ထမင်းလည်းမစားဘူးတဲ့။* ဟုတ်ပါတယ်လေ.. ကျွန်တော်တို့က အရင်က ထမင်းစားတာမှ မဟုတ်တာ.. ။ ဒီမှာက ကျွန်တော်တို့အတွက် ကြောင်စာဆိုတာ သက်သက်ရှိတယ်လေ..။ ခွေးလေးတွေ အတွက်လည်း ခွေးစာဆိုပြီးရှိတယ်..။ ဒါပေမယ့်လည်း နောက်ပိုင်း ကိုကိုနဲ့တွေ့မှ ကျွန်တော် ထမင်းစားတတ်သွားတော့တယ်။ နောက် ကျွန်တော်တို့ ဒီကကြောင်တွေက ကိုကိုတို့ဆီက ကြောင်တွေလို မအော်ကြဘူး။ အစာတောင်းချင်ရင် (ကိုကိုနဲ့မတွေ့ခင်တုန်းကတော့) အရင်ဆုံး ကျွန်တော့သခင်(တရုတ်မလေး) ကို မျက်လုံးလေးတစ်ချက် ဝေ့ကြည့်လိုက်တယ်။ ဒါဆိုရင် သူကလည်း ကျွန်တော် ဗိုက်ဆာနေတယ်ဆိုတာ သိပြီးကျွန်တော့ကို အစာကျွေးတော့တာပဲ။ သူ့ဆီမှာတုန်းက အစာ၀၀ စားခဲ့ရပေမယ့် ကိုကို့ဆီကလို မေတ္တာမျိုးတွေ ကျွန်တော်မခံစားခဲ့ရပါဘူးဗျာ။

>>> နောက်ပြီး ကိုကို အစာကျွေးတာနဲ့ပတ်သတ်လို့ ကျွန်တော်ပြောပြရဦးမယ်။ ပထမတုန်းက ကိုကိုက ကျွန်တော်တို့ကို အရိုးလေးတွေကျွေးတယ်။ ဒါပေမယ့်နောက်ပိုင်း ကျွန်တော်တို့ အရိုးမစားနိုင်မှန်း သိတော့ သူစားတဲ့ အသားနဲ့ပဲ နယ်ကျွေးတော့တယ်။ အဲလိုနယ်ကျွေးတာတောင်မှ ကိုကိုက တယုတယ အသားလေးတွေကို ပါးစပ်လေးနဲ့အရင်ဝါးတယ်၊ ပြီးမှ ထမင်းနဲ့နယ်ကျွေးတာ။ ကျွေးရင်လည်း သူများတွေလို ကြမ်းပြင်ပေါ် ပုံကျွေးတာမဟုတ်ဘူး။ သပ်သပ်ရပ်ရပ် သတင်းစာစက္ကူလေးကို အောက်ကခံပြီးကျွေးတာ။ (ကိုကိုတို့ဆီမှာ ပန်းကန်က အလုံအလောက်မရှိလို့ ကျွန်တော့ကို ပန်းကန်နဲ့မကျွေးတာပါ။ ဒါပေမယ့် ဘယ်လိုကျွေးကျွေး ကိုကို့မှာ စေတနာဓါတ်တွေကတော့ အပြည့်ပဲဆိုတာ ကျွန်တော်သိပါတယ်။) အဲလိုကျွေးတိုင်း ကိုကို ဆုတောင်းတာလေးကို ကျွန်တော်အမြဲကြားနေရတယ်။ *ဤသို့ကျွေးမွေးရသော ကုသိုလ်သည် တပည့်တော်အား နိဗ္ဗာန်သို့ ရောက်ကြောင်း အထောက်အပံ့ ဖြစ်ရပါစေသား* တဲ့။ ကျွန်တော်လည်း သေချာနားမလည်ပါဘူး။ ဒါပေမယ့် ကြားပါများတော့လည်း နားယဉ်သွားတယ် ထင်ပါရဲ့။ နောက်ရှိသေးတယ်။ တစ်ခါတစ်ခါ ကိုကို ကျွန်တော့ကို တွေတွေလေးစိုက်ကြည့်ပြီးပြောတာ။ *အော်.. ပူရှကင်လေးရယ် မီမီလေးလည်း သနားစရာနော်။ ဘယ်တော့များမှ လူ့ဘ၀ကို ပြန်ရမလဲ ကိုကိုမသိပေမယ့် အမြန်ဆုံးရောက်ပါစေလို့ ကိုကို ဆုတောင်းပေးပါတယ်* တဲ့။ ဒါလေးည်း ကျွန်တော်နားယဉ်နေပါပြီ။

>>> နောက်တစ်ချက် ကိုကို့ကို ကျွန်တော်ချစ်ခင်လေးစားရတာ တစ်ခုရှိသေးတယ်။ ကျွန်တော် အရင်က ထင်နေတာက ကိုကိုသည် ငါ့ကို အချစ်ဆုံးလို့ထင်ထားတာ။ ဘာလို့လဲဆိုတော့ ကျွန်တော်က တအားလှတာကိုး။ အမွှေးလေးက အ၀ါနဲ့ အဖြူစပ်ကြားလေး။ နောက်ပြီး ကျွန်တော်က တခြားကြောင်တွေနဲ့ (ကိုကိုတို့နေတဲ့ အထပ်မှာ ကျွန်တော်အပါအ၀င် ကြောင်ကသုံးကောင်ရှိတယ်ခင်ဗျ။ နောက်နှစ်ကောင်လုံးက ကျွန်တော့လို မလှဘူး။ အမွှေး မည်းမည်းတွေချည်းပဲ။) ယှဉ်ရင် အကောင်လည်းပိုကြီးသလို ၀လည်းပိုဝတယ်။ ပြောရရင် ပျိုတိုင်းကြိုက်တဲ့ နှင်းဆီခိုင်ပေါ့ဗျာ ဟဲ ဟဲ..။ အဲဒါကြောင့် ကိုကို ကျွန်တော့်ကို အချစ်ဆုံးလို့ ထင်ထားတာ။ ဒါပေမယ့် မှန်းချက်နဲ့ နှမ်းထွက်လွဲသွားမှန်း ကျွန်တော်နောက်မှ သိလိုက်ရတယ်။ ကိုကိုက ကျွန်တော့်ကိုမှ မဟုတ်ဘူး။ ကျန်တဲ့ အမည်းနှစ်ကောင်ကိုလည်း ကျွန်တော့်ကို ချစ်သလိုမျိုး ချစ်တာပဲလေ။ ဒါပေမယ့် အဲဒီ နှစ်ကောင်က ကျွန်တော့်လောက် မလိမ္မာဘူး။ ကိုကို့ အပေါ်လည်း ကျွန်တော့် လောက် လေးစားမှုမရှိဘူး။ ပြောရရင်တော့ ကျွန်တော်သိပ်ကြည့်မရဘူးပေါ့ဗျာ။ ဒါပေမယ့်
ကျွန်တော်ကသာ ကြည့်မရတာ။ ကိုကို ကတော့ အပြုံးမပျက် ပန်းပန်လျက်ပါပဲလေ။ (ချစ်လျက်ပဲလို့ ဆိုလိုတာ။ ကျွန်တော်လည်း ကိုကိုနဲ့တွေ့မှ စကားတွေတတ်လာတယ်။ ဟ ဟ)

>>> တစ်ခါတစ်ခါ ကိုကိုစာကြည့်နေတဲ့အချိန် ကိုကို့ပေါင်ပေါ် ကျွန်တော်တက်အိပ်တယ်။ ကိုကိုက ကျွန်တော့်ရဲ့ ခေါင်းလေးကို ပွတ်လိုက်၊ မေးစေ့လေးကို ပွတ်လိုက်နဲ့။ ပြောရရင် တကယ့် feel ပဲဗျာ။
ဒီနေ့လည်း ကိုကိုထမင်းစားနေတုန်း အမဲလေးတစ်ကောင် ရောက်လာတယ်။ ကိုကိုကလည်း သူ့အာရုံနဲ့သူမို့လို့ ထင်တယ်။ ကျွန်တော့်ကို ထမင်းကျွေးဖို့ မေ့နေတယ်။ ကျွန်တော်ကလည်း ကိုကို အာရုံပျက်မှာ စိုးလို့ အော်လည်းမအော်ဘူး။ ခေါင်းတို့၊ ကိုယ်လုံးတို့နဲ့ ပွတ်တာမျိုးလည်း မလုပ်ဘူး။ အဲဒါကို ဟိုငမည်းကောင်က အလိုက်မသိ သွားအော်တယ်လေ။ အားပါးပါး ကျွန်တော်လေ အဲဒီငမည်းကို စိတ်ရှိလက်ရှိ ထုချေပစ်လိုက်ချင်တာ။ ကိုကို့ရှေ့မှာမို့လို့။ ကိုကိုက အဲလို ရန်ဖြစ်တာတွေ မကြိုက်ဘူးလေ။ ဒါကြောင့် ကျွန်တော်လည်း ကိုကို စိတ်ချမ်းသာအောင် ဆင်ခြင်နေရတယ်။ အဲ.. အဲလို ငမည်းကောင် အော်သံလည်းကြားရော.. အဲဒီတော့မှ ကိုကိုလည်း ကျွန်တော်တို့ကို ထမင်းကျွေးဖို့ သတိရသွားဟန်တူတယ်။ ချက်ခြင်းပဲ ကြက်သားကြော်လေးကို ပါးစပ်နဲ့ဝါးပြီး ဟိုငမည်းကောင်နဲ့ ကျွန်တော့်ကို တစ်ယောက်တစ်ပုံစီ နယ်ကျွေးတော့တယ်။ ဒါတောင် ဟိုကောင်က တစ်ချက်တစ်ချက် ကျွန်တော့် အပုံကို လာနှိုက်ချင်သေးတယ်။ ကိုကိုကလည်း ဒါကိုသိလို့ ထင်ပါတယ်။ ကျွန်တော်မ၀မှာစိုးလို့ အဲဒီငမည်းကောင် စားပြီးပြန်သွားတော့ ကျွန်တော့်ကို ထပ်နယ်ကျွေးပါသေးတယ်။ အော်.. ကိုကို့ရဲ့စေတနာတွေနဲ့ ကျွန်တော့်အကြောင်းတွေ ပြောရရင်တော့ အများကြီးပါပဲဗျာ။ ဘာပဲပြောပြော ကျွန်တော်ကတော့ အခုဆို ကိုကို့ ကုတင်ပေါ်မှာ တက်ခွေနေပြီလေ။ ကိုကိုကတော့ တစ်တောက်တောက်နဲ့ စာရိုက်နေတုန်း။

ဒါလေးကို ဖွင့်ကြည့်ပါ။ ချစ်စရာလေးတွေ တွေ့ရမယ်နော်။

http://www.jacquielawson.com/viewcard.asp?code=1560479383964&source=jl999

လေးစားစွာဖြင့်
ဖိုးသား

12.11.2008, TUE:, 02:00:25 am
pyaesoneaung2007@gmail.com